Із қалдыру – Абдрахман Асылбек

Шаруашылық батығы былай деді:
«Қолдаса Құдай мені,
Дәл бүгіннен қам қыламын,
Артымда із қалдырамын:
Ең алдымен асфальт алдырамын,
Сара жол салдырамын.
Содан соң кірпіш алдырамын,
Мәдениет сарай салдырамын,
Ауылды думан-ән қыламын.
Содан соң ағаш алдырамын,
Балабақша салдырамын.
Содан соң аспаз алдырамын,
Шайхана салдырамын,
Елді шайға қандырамын.
Содан соң сауна салдырамын,
Ел құмарын қандырамын.
Содан соң наубайхана салдырамын,
Дүкен толы нан қыламын.
Жастарға тілімді алдырамын,
Ауылда қалдырамын,
Алдарын толы мал қыламын.
Не сұрап келсе де алдыма кім,
Тілегін бар қыламын.
Бәрін де жаңадан салдырамын,
Елімді таң қыламын,
Сөйтіп, артымда із қалдырамын.
* * *
Бастық бәрін де алдырды,
Бірақ, өзіне ғана үй салдырды.
Көп ұзамай істі боп, мәңгірді,
Осылайша артында «із қалдырды».