Пародия туралы түсінік – Абдрахман Асылбек

Пародия жазсам жұртқа ұсынып,
Аз да болса керек оған түсінік.
Абыройым артады деп айта алман,
Ақындардың абыройын түсіріп.
Ақындардың білем ақын екенін,
Өз басына таға алмаймын жеке мін.
Шәлкем-шалыс шумақтары кезіксе,
Соны ғана тілге тиек етемін.
Не тынады тым байсалды жүргенде?
Жақсы емес пе анда-санда күлген де?
Ақынның бар жазғанына баға емес,
Пародия – жеңіл оспақ білгенге.
Дей алмаймын өз басыма пайда бар,
Әзілімді түсінер жан қайда бар?
Ақындардың жеңілтегі жауығып,
Ақкөңілі шын досыма айналар.