Пайдалы іс – Ернұр Сейдахмет

Ерте тұрып, қолға алып күректі.
Тазаладық атыз бенен жүйекті.
Қарындасым топырағын қопсытып,
Бізден қалмай шелегіне гүл екті

Баламыз біз тәртіпті де, үлгілі.
Аялайды көктем болып күн нұры.
Әжем айтқан: «Ел есінде қаларлық
Бір пайдалы іс жасау міндет бұл күні».

Болбыр емес, былжыр емес,бекембіз.
Еркелетер әжем сөзі- шекерміз.
Не істейміз,- деп, -Ұлы күні ұлыстың,
Ақылдастық інімізбен екеуміз.

Тал егеміз бойы көкпен таласар.
Жүргіншілер : Кім еккен?,- деп қарасар.
Қаламыздың көшесінде ағаш аз
Сәнді, жарық көшесіне жарасар.

Шыбық ектік, көктеп, өніп, өсе бер
Сылдыраған арық суын кеше бер.
Ұл мен қызға біз ектік деп айтармыз,
- Қандай биік мынау ағаш!, - десе егер.