Мұнайшы әні

Мұнай жерден құдай берген нәсібім,
Мұнайшылық мәртебелі кәсібім,
Жасырынған жер астында жеті қат,
Қазынаның біз аламыз асылын!

Мұнаралар маң далада мұнартқан,
Көк теңіздің түбін тесіп, тулатқан,
Бұрқыратып от-жалын мен көбігін,
Бұлтты қуып, көк пен жерді шулатқан!

Қайырмасы:
Адал еңбек болмасын деп қиын сын,
Ел тілегі бір арнаға жиылсын,
Қара алтыны қазағымның құт болып,
Берекелі ұрпағына бұйырсын!

Халқымызды қарық қылған мұнайға,
Мың рахмет жаратушы құдайға,
Байлығың мен бағың болып баянды,
Мұнайшы мен мұнай барда мұңайма!

Апта бойы тыным таппай вахтада,
Қайыстаймын, күн қақтаған қап-қара,
Ел байлығын алып берем қайыспай,
Ішің білсін, мақта, мейлі мақтама.

Мен де қара, мұнай қара, жер қара,
Қара қазақ мекендеген кең дала,
Марапаттап мұнайшы мен мұнайды,
Қара алтын деп атап кеткен ел дана!

Қайырмасы:

---