Өлең, жыр, ақындар

Қарлығаш дәурен

  • 31.08.2020
  • 0
  • 0
  • 1729
Қарағым, біздің баста да
Қарлығаш дәурен көп тұрмас.
Қанатсыз қалсақ, масқара,
Қанаты барлар жақтырмас.
Көнбей-ақ желдің иіне,
Қонбай-ақ жапан түздерге.
Ұшайық, байтақ дүние
Жеткізер болса біздерге.
Бар шығар біздің жолда да
Ылдилар менен ылайлар.
Қиын ғой ұшу сонда да
Жете алмаймын деп кім ойлар?
Бар шығар шөлде бізге бір
Жалтақтап жүрген жүргінші.
Терілмей қалған түзде бір,
Мұрныңды жарар гүл иісі.
Жапан далада жаз болар
Жалғыз үйлерге жетейік.
Шаңыраққа қону аз болар,
Ұя да салып кетейік.
Қол бұлғап бізге әр жақта,
Сағынтып қалған екенбіз.
Бұрылмай қалай кетерміз,
Бір қонбай қалай өтерміз?
Манадан ұшқан жеріміз
Қозы көш қана секілді.
Мезгіл ме, мезгілдеріміз –
Еңкейіп кеткен екінді.
Қонбай-ақ желдің иіне,
Қонбай-ақ жапан түздерге.
Ұша берейік, дүние
Жеткізер болса біздерге.
Қарағым, бізді баста да,
Қарлығаш дәурен көп тұрмас.
Құласақ жер ғой баспана,
Жер бізді көкке лақтырмас.



Пікірлер (0)

Пікір қалдырыңыз

Өмір жылдам атқан оқтай зымырар

  • 0
  • 0

Өмір жылдам атқан оқтай зымырар,
Көңіл – құбылаң. Құбыласына жығылар.
Біз – пендеміз өз билігін өзі әлі
Ұстай алмай от пен суға ұрынар.

Толық

ФЗО-ға кеткен жеңешем

  • 0
  • 2

– Жеңеше! – дедім,
Жеңешем маған жалт қарап,
Боталап көзі жылауға өзі шаққа қап.
–Кенжем-ау, – деді, – ертең-ақ келем, дәм жазса,

Толық

Ақынға сыр

  • 0
  • 0

Жер бетінде бала Жамбыл бар еді,
Жер бетінде жаңа Жамбыл бар еді.
Дана Жамбыл жүзге жете көз жұмды,
Бала Жамбыл он-ақ жасар бала еді.

Толық

Басқа да жазбалар