Өлең, жыр, ақындар

Балалығым жоқ дейтінім

  • 02.09.2020
  • 0
  • 0
  • 1053
Мылтық атып, мылтық оқтап көрмедім,
Құс құлатып, гүлді таптап көрмедім.
Зембілдермен жаралыны көтеріп,
Окоптардан қанды соқпақ көрмедім.
Көрдім бірақ
Көп мүгедек кәріпті,
Көре-көре оларға көз қанықты.
Ести-ести жесір-жетім жоқтауын
Жырымда да содан салқын қалыпты.
Ол ерлік қой, қан майданда от кешсең,
Жауыңменен жағаласып кектессең.
Оқ та кешпей, от та кешпей зардабын
Арқалап көр бір тамшы жас төкпестен.
Соғыс көрмей, көр арқалап зардабын,
Көр арқалап соңындағы салмағын.
Сен әкеңнен, сен көкеңнен айрылдың,
Сұм соғыстың тауқыметі жан-жағың.
Ал көктеп көр, ал бүрлеп көр, қаулап көр,
Ал маздап көр, ал лапылдап, лаулап көр.
Соғыстан соң аққан қан мен шыққан жан
Құнына сен күнәһардай жауап бер!
Сен жауап бер, келер ұрпақ, өтінем,
Дүниенің тік қарау үшін бетіне.
Соғыс, соғыс!
Тастап кеткен сауалың
Жеткізбейді шалғайың мен шетіңе.
Өрті, дерті – кетер соғыс зардабы,
Кетер кегі, қайғысы да қандағы.
Бұл жалғанда жалғыз бақыт – балалық,
Менде бірақ сол балалық болмады.
Мылтық атып, мылтық оқтап көрмедім,
Құс құлатып, гүлді таптап көрмедім.
Соғыстан соң көрдім күллі зардабын,
Балалығым жоқ дейтінім сол менің.



Пікірлер (0)

Пікір қалдырыңыз

Баламын әлі

  • 0
  • 0

Баламын әлі...
Басымда менің көп қиял,
Басымды ертең тауға да, тасқа соқтырар.
Заманның жал-жал толқынына да лақтырар,

Толық

Шалғындар әбден орылып, орны қалған мезгілде

  • 0
  • 0

Шалғындар әбден орылып, орны қалған мезгілде
Шашадан шыққа малынып, қоңыр қырларды кездің бе?
Тозбаған жердің топырағы жатыр ма екен бозарып,
Туған жеріңді осы сәт сағынғаныңды сездің бе?!

Толық

Өмір жылдам атқан оқтай зымырар

  • 0
  • 0

Өмір жылдам атқан оқтай зымырар,
Көңіл – құбылаң. Құбыласына жығылар.
Біз – пендеміз өз билігін өзі әлі
Ұстай алмай от пен суға ұрынар.

Толық

Қарап көріңіз

Басқа да жазбалар