Тамылжып бұлбұл салар ән – Қалампыр Кенжеғалиева

Тамылжып бұлбұл салар ән,
Таңдарды таңға жалғатып.
Таңғы асқа құны татитын,
Таңғы ауаң қайда Алматым?
Қаптаған көлік ауаны
Тіледі жүйткіп шаңдатып.
Мұнардан көзін ашпай тұр,
Мұңайған ару Алматым.
Аспанның өзін алғандай
Көкала шаңға аунатып.
Тал-терек, саяң азайып,
Жарнамалармен жасардың.
Атағың жарып жаһанды
Сауданың төрі атандың.
Көз көрген небір ғажапты
Өзгерткен мазмұн, мәнімен
Алматым бөлек түрлендің
Өркениет «сәнімен»?!
Түрлендің танымастай боп,
Бояуын жағып шетелдің!
Жастықтың пейіш мекенін,
Аңсаймын жиі - не етермін..?