Өліп-өшіп – Сәкен Иманасов

Өліп-өшіп,
өзі кеп шешіндірді,
шешіндірді,
мен жаққа төсін бұрды,
...содан кейін білмеймін...
өліп-талып,
көріп барып жұмақты...
есім кірді!..
Сезім шіркін болды ма қарақшы анық,
есім кірді,
араға сағат салып,
...ес-түсі жоқ құмарлық
екеуімізді
құрбандыққа жіберді-ау қабат шалып!
...Көрмесінші дедің бе ұрлығыңды Ай,
әрі барып отырдың бір қырындай.
...Сансыз күндер
саналмай өтіп жатыр,
тұсаулы аттың
үзілген шылбырындай!