Елжіреуік бір сезім езді ырқымды – Исраил Сапарбай

Елжіреуік бір сезім езді ырқымды...
Көмейіме кептеліп сөз де іркілді.
Келтіре алмай отырмын сені бермен,
Өлтіре алмай отырмын көз құртымды.
Бірде жақын арамыз, бірде шалғай.
Шалғай шақта шарқ ұрам тілдесе алмай.
Мен жабырқап жүремін іштен тынып,
Сен жарқырап жүресің күнде шамдай.
Сабыр сарқып салбөксе сағым, мұнар,
Сəл көрінбей қалған сəт сағындырар.
Жалауымды жықпас жан
қалауымды
қабыл қылар,
кім білсін халімді ұғар...
Əрі шалғай арамыз, əрі жақын.
Шамаң бар ма жай сұрап, хал ұғатын?
Адам керек ағынан жарылатын,
Қамығатын,
Жылайтын,
Сағынатын...
Айырбастап музамды мұңды ырғаққа
Түн жамылып барсам ба тұнжыр баққа?
Жұмақ іздеп жүргенде...
Тағдырым-ай,
тап болдың-ау тағы да бір жұмбаққа.