Телефон күту – Мағиза Құнапияқызы

Естен танды қиялым да,
Жайылмады қанаттарым.
Тілдеспейді ол бүгін маған,
Тезірек өт сағаттарым.

Сағыныштың шіркейлері,
Үймелейді көзіме кеп.
Жайламасын сүркей мені,
Тезірек өт, тезірек өт.

Жай қозғалар сағат тілі,
Жылдамдатса жүрістерін.
Минут тілі шыр айналса,
Тұрма секунд тыныш тегін.

Маған келе жатқан мұңды,
Орта жолдан кетіре сал.
Алпыс рет сыртылдамай,
Он екі рет секіре сал.

Тауысам ба жүрек сырын,
Отырсам да бірден жазып.
Өкпелетіп алдым білем,
Көңілі оның гүлден нәзік.

Биік еді назарымда,
Өркен жайған бәйтеректей.
Хабарласып қалар ма әлде,
Тұра тұрсаң қайтеді өтпей!