Қазақтың қызы – Мағиза Құнапияқызы

Көзінше жұрттың қарамас телміріп жарға,
Сағынған шақта ес көрер жасанды елесін.
Сүйемін деген сөзін де айтады іштей,
Сағындым деген сөзі сол: - қашан келесің?

Адалмын деген сөзі сол- бір тыным алмай,
Жүреді үйдің ісімен әбігер болып.
Жарынан күман ойласа қайғырып іштей,
Әдемі жүзі аз күнде кетеді солып.

Ренжіп қалса онысын ешкімге айтпай,
Бір күнде үйін сан рет сыпыра берер.
Кешіксе жары уағында үйіне қайтпай,
Қысылған жаны мұрнының ұшына келер.

Баласын баптап, шошынса жүрегін аптап.
Дайын тұр десең елемес азаптың жүзі.
Арға дақ салу ойына кіріп те шықпас,
Есіл аналар – кешегі қазақтың қызы!