Қар жауды – Қасымхан Бегманов

Қар жауды
кеше қыламықтанып,
Қонақтап жатты дөңгелеп.
Ашылмай жүрген сыр анықталып,
Лаулады қайта сөнген от.
Ақтоқты ару
арманым едiң,
Тағдырдың жолы шырғалаң.
Он жетi жаста толғанып елiм,
Сол қызды алғаш жырлағам.
Дүрия көйлек
жарасып саған,
Шаттана сол кеш билеп ең.
Ұрлана қыздар қарасып маған,
Қарасып саған... сүйген ем.
Мейiз тiлiңнiң
жұтқан ем балын,
Жып-жылы түнде мас болып.
Мәңгiлiк серiк тұтқан ем, жаным,
Жанардан ақтың жас болып...