Сағындырған көктем

Балғын гүлдей жайнап,
Бақыт жырын тойлап,
Арман нұрын аңсап құшқандай.
Бірге жүрдік нәзік
Қанаттарын жазып,
Қарлығаштар қалқып ұшқандай.

Қайырмасы:
Тұнып жатқан балдай,
Күлім қаққан таңдай,
Мына өмірге қандай
Ғашық едім бала кезімде.
Махаббатым менің,
Қалып қойды сенің,
Мөлдіреген қара көзіңде.

Сағым болып кеткен,
Сағындырған көктем,
Оралмайсың қайта біздерге.
Шөліркеген жүрек,
Шаршағанда жүдеп,
Бір өзіңнен тірек іздеуде.

Қайырмасы.

---