Кеудеме сыйған сезім ағыны әрең – Қанипа Бұғыбаева

Кеудеме сыйған сезім ағыны әрең,
(Ағысты өтіп кетсе сағынар ем).
Ұмытып кеткен қара көздеріңе
Кездестім ойда жоқта тағы да мен...
Кімге енді орта жолда елігермін,
Келмейді оттай жанып тебіренгім.
Шоқ гүлдің ар жағынан сені көрдім,
От күннің бер жағынан мені көрдің...
Көзіме көзің қарар сырды бағып,
Отырдым бір қызарып, бір қуанып.
Тағы да, сүйікті арман, күйіп қалған
Қанатын жүрек құсым тұрды қағып.
Отырмын өтіп кеткен ойлап күнді,
Құштарлық қояды екен байлап тілді.
Жастықты қашықтап бір қайта оралған
Білгендей бүкіл дүние тойлап тұрды.
Келеміз шексіз-шетсіз күндерге еріп,
Неге біз бір тіл қатып үлгермедік.
Қос жүрек асығады, тікен емес,
Тұр біздің арамызды гүлдер бөліп.