Ұстаздарым

Аш, бабын сөздің, дүр Омар,
Жөн болса сөзің тыңдалар.
Келіспесе кестесі-
Ретсіз сөзді кім тыңдар!
Намақұл сөздің мысалы:
Аң көрмей ұшқан далаға,
Алмайтын құспен тең болар.
Лепесі қабыл ғазиздың,
Жақсының сөзі ем болар.
Нағыз ділмар сөйлесе,
Есіткен адам таңданар,
Жай жүргенде-бәрі де ат,
Шапқанда, шама аңдалар.
Халық ішінде қадірлі,
Үнемді басқан қадамы,
Тимеген не бір жорға бар!
Әр дүкенде бір зауыт,
Ашылып тұрған форма бар.
Шернияз, марқұм Бұдабай-
Кетпеген сөзі ұнамай!
Сарыбай Сәдір, Әзілкеш-
Және-дағы би Бекіш
Тап салмаған таусылып,
Сағасы терең арналар.
Сырманның ұлы Аяған,
Табылған сөзі оядан,
Көңілі-шалқар көлмен тең,
Үйрек ұшып, қаз қонар.
Уаһ, дариға, өтті Толыбай-
Сөз жүйесін тиеген,
Дулығалы құба нар!
Шақ айтса да, шағулы,
Шегебайдың сөзінен-
Хауіп етіп әркім қорғалар.
Олардай жүйрік жоқ енді-
Бағынан бұлбұл ұшырған,
Опасыз дүние бейқарар.
Балқы Базар, дүр Оңғар-
«Алқа!» деп атты қойғанда,
Қаншама пырақ болса да,
Қарасын көрмей қаңғалар.
Ересім жүйрік Ешнияз-
Есіткен жан тоймайтын
Шекермен сөзі барабар.
Қарасақал Ерімбет-
Нұсқалы сөздің кестесі,
Қалам, қағаз ұолға алса,
Тіл мен жағы қозғалар.
Дүзбенбетұлы Жиенбай-
Ақ домбыра қолға алып,
Ұшатын құстай қомданар.
Ерегіскен ер болса,
Екі талай жер болса,
Аянбай шауып жолды алар.
Абақан Кете Аманжол-
Алуға қардар табылса,
Жеңісік тауар онда бар.
Киікшіден шыққан қос жүйрік,
Сүйкімбай мен Сүйіндік-
Әнмен сөзін ажарлар,
Әрі жырау, һәм бақсы,
Сөйлесе сөзі тым жақсы,
Сарыбайдан шыққан Құлназар.
Алтын Топжан, Әлібай,
Егесті жерде тоқталмай,
Нұсқалы жауап сөз табар.
Есенжол, Жүсіп һісімді-
Сөздері сұлу пішімді,
Жаңа өрім жүйрік-бозбала
Байлауда тұрған тағы бар...
Таң айырған жүйрік бар,
Қосылған соң шабылар,
Көрінгенмен жарысқан
Бір шобыр біздің қолда бар.