Нәресте күлкісі – Қанипа Бұғыбаева

Жүзінде ойнап жылу атты күн күші,
Алаңсыз бір, айтшы, дүние,
Күлдің бе ей?!
Нәрестенің мына тұңғыш күлкісі,
Тұнық судың бетіндегі иірімдей!..
Жүрегіңе сызып сәуле жол мәңгі,
Мейіріммен мас боларсың осы үнге.
Ол білместен бояманы, жалғанды,
Күледі шын әз ананың төсінде!
Неткен күлкі, неткен ләззат, тәңір-ау,
Нең қалды еріп, балқып жаның қызбаған.
Оның тұңғыш жымиысын ал, мынау,
Бүкіл дүние көздерінен қызғанам!
Шомылдырған рахаттың бағына,
Болса өмірде сол күлкідей пәктілік.
Тұнық су ол иірілген шағында,
Шошытасың, ойнама тас лақтырып!..