Өлең, жыр, ақындар

Сабылып сезімдердің сәуірі кіл

  • 13.01.2022
  • 0
  • 0
  • 650
Сабылып сезімдердің сәуірі кіл,
Басылмай жүректердің жауыны бір,
Бұрқырап ақ көбігі көкке атылған
Бұрқанған Мұқағали дәуірі бұл.
Жаңа күн, жалын бол да жарқыра, сен,
Сұлулық сыбызғысын тартып әсем.
Жұтылып көлеңкеге келген еді
Жарты өмір, жарты бақыт, жарты көшем.
Қалтылдап ескектері ескіліктің,
Жылтырап шамы жанған кешкі үміттің.
Дауысы жапандағы жалғыздықтың
Барады бірте-бірте естіліп тым.
Маңдайын тау мен тасқа соқтыра алған,
Жарқырап жол ашады өткір арман.
Білемін, сыңар дауыс шуға айналып,
Білемін, жалғыздықтан топ құралған.
Толқындар толықсыған тулай келді,
Толқынға толқын соқса шулайды енді.
Қамыққан қалың елге көлеңкеде
Жаңа күн, жаңа бақыт тумай ма енді?
Қамыққан қалың ел бар көлеңкеде,
Желбіреп желге ұшады желең төбе.
Қырдағы қызғалдақтың исіне елтіп,
Бақытын күтеді олар кең өлкеде.



Пікірлер (0)

Пікір қалдырыңыз

Құйшы, жаңбыр, жан жүрегім сергісін

  • 0
  • 0

Құйшы, жаңбыр, жан жүрегім сергісін,
О, жаратқан, найзағайдың бер күшін.
Алтын күннің ақ шуағы алма іздеп,
Жұпар бақтың ерінбестен терді ішін.

Толық

Төгіліп қыркүйектің нұры көктен

  • 0
  • 0

Төгіліп қыркүйектің нұры көктен,
Ақ қайың мұңаяды сыры кеткен.
Үзілді жапырақтар, күз келді... деп
Айналып кете алмай жүр тірі көктем.

Толық

Аула ішінде аппақ гүл көміп есік

  • 0
  • 0

Аула ішінде аппақ гүл көміп есік,
Жұлдыздарым жанады өліп-өшіп.
Өң мен түстің ішінде талықсыдым,
Өлең түсті қызғалдақ өмір кешіп.

Толық

Басқа да жазбалар