Ғарыштағы жебе

Қазақтың ұлы ақыны Фариза ОҢҒАРСЫНОВАҒА

Алланың, бәлкім, дерегі
Жолдаған тылсым алыстан –
Бір жебе заулап келеді
Тұңғиық түпсіз ғарыштан!
Себездеп жеткен нұр-сынды
Алланың ұлы дерегі –
Түйреп-ақ өтіп тылсымды
Бір жебе заулап келеді!
Кеңестік, мейлі қай ғасыр…
Бәрі бір оған заулаған!
Әділдік – оның жолдасы
Туралық одан таймаған!
Алладан алған сәлемді
Сол жебе – Сіздің нұрыңыз!
Әлдилеп тұрған әлемді
Сол жебе – Сіздің жырыңыз.
Жаныңа сөзбен от салар
Жалғаның жайлы зар еткен,
Ақындар менен патшалар
Бұлбұлдай сайрап… бәрі өткен.
Кеңестік … Уақыт…
Жоқ бәрі!
Біз сүрген Өмір ғана бар!
Әлемнің асыл мақтаны –
Бар сосын… Сіздей даналар!
Қай ғасыр қай бір заманда
Тарихта жаны жаралы, -
Сабақ боп сансыз адамға
Сол жебе ғана қалады!
Сол жебе – Сіздің нұрыңыз,
Сол жебе – Сіздің жырыңыз!

Астана. 30 маусым, 1998 ж.