Екі басты самұрық

(аударма)

Достар, достар, бір жұмбақты шештім мен:
бүкіл елді ауыр халге жеткізген
кім еді деп сұрамаңыз ешкімнен –
Ресейдің гербіне, әне, тағылып,
қайғымызға, сорымызға малынып,
тұр ақымақ - екі басты самұрық!
Мұны ойымнан шығарғам жоқ ақырын,
халық-дана бос айтпаған нақылын:
«Не заманнан бұғау салып ерікке,
баукеспені, қанішерді желікпе
қолдап-қорғап су бүріккен деміне
барлық пәле — самұрықты гербте!»
Достар, достар, келсін бізге қайдан құт,
ақымақ тұр бар өмірді айран қып.
Самұрықты мөрге жіпсіз байландық,
содан біздер бақытсызбыз, жарандар,
содан жаппай ішкіштерге айналдық.
Біздің орыс ағайынға ас қайғы,
ішіп алса, төбелестен бастайды,
сөздерінде, өздерінде бір мән жоқ,
сүйіседі, жыласады, қақсайды –
айтатыны мисыз екі бас жайлы.
Алым алу - әкімдердің басты ісі,
пара алмаса жойылардай бақ күші.
Неге олай? Кінәлі екен бүған кім?
Себебі не? Себебі сол - бәрінің
мундирінде - сиқын қара сәнінің!-
Сол ақымақ Самұрық тұр әлі күн.
Жексұрын құс отыр қалғып бүгін де,
Сұсы бөлеп жұртты үрейлі дірілге.
Ал әкімі тонап жатыр халықты,
өмір мәнсіз, ащы сүттей іруде.
Шындық та жоқ мынау орыс елінде,
Береке жоқ, жоқ үміт те, сенім де,
Өйткені анау екі басты самұрық
түк көрмейді - жан бітсін бе темірге!
Сөз жүзінде батырсимыз тағы біз,
ал ұрлықпен құлпырады жанымыз.
Екі жүзді самұрықтай ақымақ
екі сөзді мырзалармыз бәріміз.

ВАСИЛИЙ КУРОЧКИН