Солтүстік теңізде

(аударма)

Самал ескен теңіздің жағалауын
Не жасаған бұралқы ана қауым:
түтіндетіп, ішіп-жеп, тарпаң жүріп
басқан жерін кетеді талқан қылып.
Ыржыңдасып, шомылып күн кеш еткен,
ауаны да бүлдіріп улы өсекпен.
Күймеменен арнаулы кісілері
алып барып тайызға түсіреді.
Жалаңаштап төстерін, денелерін
шешінеді үлкені-кішілері.
Аяқтары үйренген құмға сары
тітіркеніп, дірілдеп су басады,
Көңілді екен десін деп естігендер
дабырласып, айқайлап шуласады.
Ал аспанда батар күн төгіп нұрын,
түрлі түстер тізіліп өрілді мың.
Қызғылт, көкшіл бояулар арасынан
ұясына батарда көрінді күн.
Теңіз жатыр тайсалмай батыл жаны,
Тереңіне бұлттарды батырғалы.
Бұлттар өлер алдында ызаланып
кездерінен от шашып лапылдады.
Дүние тұр бусанып, шабыттанып,
Ұясына күн енді жанып барып.
Моторы бар бүйірлі қайықпенен
біз де теңіз төріне бағыттадық.
Бензин иісі бұрқырап мұрын жарып,
қайығымыз зулайды зырыл қағып.
Мың құбылған толқындар екі жақта,
өріледі ізіміз бұрымданып.
Балықшылар кайығын, түнгі оттарды
басып өтіп барамыз біз ырғалып.
Артымызда көкжиек жырақтағы
өткенменен алаулы күн аптабы,
қып-қызыл боп өртеніп тұр қазір де.
Алды - сансыз кеменің шырақтары.
Көкшіл тұман,
құбылған сағым - алдым,
Ағараңдап желкендер сабылар мың.
Еркін арал ұқсайды
жотасына
су ішінде көлбеген жануардың.
Теңіз тыныш. Ескектің үні жырдай,
Тегіс болмас тегінде шыны мұндай.
Сан желкенге оранған жүйрік кеме
тұр ортада теңіздің сұлуындай.
Қаз мойынды жел кеме тұр ырғалып,
жақұт-фонарь желкенде жымың қағып.
Ақ қалпақты адамдар отыр үнсіз,
матрос тұр көрінбей жүзі де анық.
Біз де, міне, ақыры батылданып,
Мотор үнін жайлатып, жақындадық.
Тілдесудің ыңғайлы сәтін бағып:
«Сүйреу керек емес пе? Біз дайынбыз», -
дедік біздің біріміз батылданып.
«Қажеті жоқ»,— деп сонда жауап берді
әлгі тұрған матрос қатуланып.
Шыға келген арудай сұлу бақтан
өң бойыңды сәнімен шымырлатқан
бара жатты жел кеме жай қалықтап,
кім де болса етердей түрін мақтан.
Қадаламыз кеменің оттарына
қошқыл түнде жалтылдап жымың қаққан.

АЛЕКСАНДР БЛОК

---