Ғашықтық

(аударма)

Ғашықтық, сенің көгілдір ымырт шақтарың,
тағы да: «Мәңгі сендікпін»... сәттер қас қағым.
Ұйқысыз түндер, бұлыңғыр күндер тағы да,
алысқа кеткен желкендер маңы - ақ сағым.
Еркелей құшып жондарын қарлы даланың,
неліктен сәуле қадайды күліп жанарын.
Сен болсаң, міне, жамылып өлген патшаның
қанатын аппақ,
тағы да арбай қарадың.
Періштем менің қаһарын төгіп қабақтан,
жанары - садақ, көздесе болды - дәл атқан.
Бірақ та найза-ашуы да оның мен үшін
күмістей күлкі сыңғырап шыққан тамақтан.

АЛЕКСАНДР БЛОК

---