Тағы да қар

(аударма)

Тағы да боран жағаның
іздерін бітеп, қарды үйді.
Бетінде қарлы даланың
қос жұлдыз ғана қалғиды.
Ақырып соққан құйын жел
адуын суды сапырған,
Күртіктен жал-жал үйілген
молаға ұқсап жатыр маң.
Даланы жаулап, түн қатып
жүйріктей үзген жүгенін
аспан мен жерді шулатып
сайранды салып жүр елім.
Қорабльдер де қалғыған
быт-шыт боп желкен желге ұшып,
шырмап ап бәрін қар-жылан
діңгектер қалған жер құшып.
Даланы кезіп сұм ажал
кернейін қарлы сарнатып,
күртікке толы жыралар,
көрінбей көзге алда түк.
Дала мен шырқау шың-құздар –
бәрінде сұрғылт бір ажар,
Жылаусыз, нұрсыз жұлдыздан
сығалай қарап тұр ажал.

АЛЕКСАНДР БЛОК

---