Жыр жазу деген

(аударма)

Жыр жазу деген –
аласапыран теңіздің кәрі жартасын
тырнағыңменен шимайлау;
үніңмен тежеп мәңгілік күштің балтасын
жүректе тұнған мұңды айдау.
Жыр жазу деген –
арпалыс, өлу, тірілу, тілің сынса да
тірліктің отын тұтатып, оймен пайымдау;
қатыгез уақыт күліне айналдырса да,
шындықты айтудан тайынбау.
Жыр жазу деген -
жүрсең де талай қорлықты кешіп, ашынып,
жаныңды жаншып жалған дау,
адалдық пенен ақиқатқа ғана бас ұрып
өткінші үндерге алданбау.
Жыр жазу деген -
қайықта тұрып дауылды кешу басынан,
сезініп күшін ағынның;
сыбызғы жасап қамыстай қабықшасынан
сүлдері қалған жаныңның.
Күй кешіп солай ақырет дәмін татқасын,
туғандай жаның тазарып сосын, қақпасын
қайтадан ашу жалғанның.
Дауыл мен теңіз арпалысқанда сенделу,
әр сәтте кешіп тосын жай,
өлі жерлерге қайтадан сосын дем беру.
Жыр жазу, міне, осындай.

ЛИЙ СЕППЕЛЬ

---