Мотивация – Әділет Рахымұлы

Шаршама, талма, жасыма!
Қиындық келсе басыңа.
Алау бол, жел бол, толқын бол,
Тоқтаусыз жанып, тасы да.

Құлама, сынба, жеңілме!
Нәпсі ырқына берілме.
Бағындырсаң белесті,
Мақтанға салып, керілме.

Адам бол, ер бол, ез болма!
Өміріңді алып тез қолға
Еңбек ет, жатпа, ерінбе
Ер азығы тек жолда

Биікте, самға, қалықта!
Қайғы келсе, қамықпа.
Қанша төмен түссең де,
Қайта ұшудан жалықпа.

Өштеспе, мүлдем кектенбе!
Жүрегің тас па, еттен бе?
Тағдырыңа жазған разы бол,
Өкінбе өткен-кеткенге.

Көрсетпе реніш, өкпеңді!
Жасыңды тоқтат төккенді.
Атылған көз бен сөздерге
Жүйкеңді құртпа текке енді.

Күмән, шүбә болмасын
Түп-түзу, дұрыс жолдасың.
Сол жолдан тайма ешқашан
Құдайым ләйім қолдасын!

Ә.Рахымұлы