Баршынға барар жолда

Қарт ақын Мұқан Сабиті
Әшекей таудың басында,
Әлдилеп өлең-сәбиді,
Қарайды сонау Баршынға.
Қарайды оты маздаған Жайлауға —
жазық Баршынға.
Ақынның әлі жазбаған
Дастаны сонда барсың ба?..
Қарт ақын жазар дастаны
Онда бip аппақ жарсың ба?..
Бағалап болған басқаны
Әлде бip кәpi жансың ба?..
Әлде бip бала қойшының
Жүрегін ұрлап жүрсің бе?..
Әлде бip асқан ойшының
Арманы қалған жерсің бе?..
Аяулы ақын көзіндей
Оңаша мөлдір көлсің бе?..
Сәулесі өткip сезімдей
Сонау от сенің көршің бе?..
Болжаман оны бұ жақтан,
Баршынға жеткіз, Баршынға.
Іздеген жанға ұзақтан
Данышпан өлең, барсың ба?..

---