Жолаушысы капитансыз кеменің – Сайын Назарбекұлы

"Жер-Шар" атты капитансыз кеменің
Жолаушысы алаңғасар неменің: —
Ей адамдар! Сіздерменен дұрыстап
Ақ жарылып бір сырлассам деп едім.
Жаның төкті, келмес кісі өлгісі,
Тәнді қамдау — ол тірліктің белгісі.
Тудың бітті, шыққан күндей батасың,
Соған бірақ келмейді адам сенгісі?
Өмір құт боп, сәтті күні күлерсің,
Өмір жат боп, жылай, зарлай жүрерсің.
Дем біткен күн мал-мүліктен тазарып,
Тыр-жалаңаш жер қойнына кірерсің.
Шешіндірер, көрге салар жалаңаш,
Байлық пен бақ арашаға жарамас.
Өмір өтті, атың өшер,сонан соң,
Бет сыйпалды, отың сөнді тарап ас.
Осылайша өмір сырғып өтуде,
Талпынбаймыз қызықты оны етуге.
Тырыссақ қой ең болмаса бір істі,
Ел сүйсінер, артта қалар етуге.

Ақтау. 31.08.2001 ж.