Жауабын сізге қалдырдым – Темірхан Медетбек

Бәріміз білеміз:
“Шеше көрген тон пішеді.
Әке көрген оқ жонады”,
Көсілген көсемді,
Шешілген шешенді
Көрген балаңыз
Ертең- ақ топ жарады.
Жердің сырын,
Елдің мұңын ұғатын
Зерек балаңыз
Өзгеден
Артып тумас па?!
Желмен жарысқан
Құлыншақтармен
Ойнап өскен ұланың
Ертең- ақ
Қазанаттардай
Қара жеріңізді
Айырардай болып
Тарпып тұрмас па?!
Ал бірақ
Жаттан келгендей боп
Өз елінен
Іргесін аулақ салатын
Безбүйрек үйге
Кім кіріп,
Кім қонбақ?!
Әкесі доңыз бағып,
Есіл- дерті жеу болған
Торайлармен
Ойнап өскен балаңыз
Өскенде кім болмақ?
Жауабын сізге қалдырдым.