Іздеймін – Темірхан Медетбек

Мен қазір
Сөздері де келіскен,
Өздері де келіскен.
Елі мен жері үшін
Билік таластырмай,
Билік бөліскен
Керей мен Жәнібектей
Көсемдерімді іздеймін.
Мен қазір
Қарсы келгенді
Жасындай жасқайтын;
Перідей бүлік,
Жындай бұзықтың өзін
Сөзбенен буып,
Сөзбенен матап тастайтын
Төле мен Қазыбек,
Әйтеке сынды
Шешендерімді іздеймін.
Мен қазір
Шапқан сайын үдеп
Мына тірліктен
Азат табатын;
Тіктеп түскен тұяқтан
Кішігірім қазан асатын
Ошақ қалатын
Тайбурыл секілді
Қазанаттарымды іздеймін.
Мен қазір
Тау қопарып,
Тас жарып кеп
Шалқасынан жатса —
Құшағына! —
Бір аумақ бұлт толатындай;
Етпетінен жатса —
Арқасына! —
Айырплан қонатындай
Қажымұқан тектес
Азаматтарымды іздеймін.
Үмітімді үзбеймін.