Тайыр Жароков

Менің сырым

Бұл бетте «Менің сырым» атты Тайыр Жароков жазған өлеңнің мәтіні берілген. Өлең тексті, өлең жолдары және толық нұсқасы осы жерде жарияланған.

10.07.2022
0
0
1048

Біреуге өмірімде
Қас қылып көрген емен,
Жанжалға тегі мүлде
Бас сұғып көрген емен.
Мүмкін, бұл кемшілігім?
Кемшілік дей алмаймын!
Ерегіс өршігуін
Ершілік дей алмаймын.
Біреуді туғалы мен
Өсектеп көрген емен,
Ол өсек қуғанымен,
Өсет деп көрген емен.
Мүмкін, бұл жуастығым?
Жуаспын дей алмаймын!
Сонымен ұласты күн,
Күн асты дей алмаймын.
Келгенше осы жасқа
Күндеуді білген емен,
Күндегіш кейбір досқа
Күңкілдеп күлген емен...
Мүмкін, бұл нашарлығым?
Нашармын дей алмаймын!
Бірақ, жоқ асаулығым,
Асаумын дей алмаймын.
Мінді бір көре тұра
Айта алмай тұра алмаймын,
Біреулер өре тұра
Жабылса, көне алмаймын!
Мүмкін, бұл мықты мінім?
Мықты мін дей алмаймын!
Бәлкім, ол мықтылығым?
Мықтымын дей алмаймын!

Тайыр Жароков менің сырым Тайыр Жароков өлеңдері

Пікірлер (0)

Пікір қалдырыңыз

Жиі қойылатын сұрақтар