Тайыр Жароков

Майданға тартты жолдастар

Бұл бетте «Майданға тартты жолдастар» атты Тайыр Жароков жазған өлеңнің мәтіні берілген. Өлең тексті, өлең жолдары және толық нұсқасы осы жерде жарияланған.

12.07.2022
0
0
674

Қыранның балапанына
Біткендей көкшіл қауырсын,—
Отанның алақанында,
Өскен, достар, бауырсың.
Қауырсыны қатқанда
Жас қыран қанат қағатын,
Сондай,— жолға тартқанда
Сезді дос майдан сағатын.
Қаламдас туған ақындар —
Майданға тартты жолдастар,
Жауға дәл оқ атыңдар,
Жолдарың болсын, жан достар!
Жеңемін деген сеніммен,
Майданға мерей аттану.
Аброй ғой елінен
Ерлік деген атты алу.
Ұлы Отаным әлемді
Ерлігімен таң қылған.
Тапсырам сізге сәлемді
Ақ шашты ақын Жамбылдан.
Майданда жеңгіш халқымыз
Болмысы болат батырдан.
Жалынды сәлем айтамыз,
Жазушыдан, ақыннан.
Дұшпанға оқ шашамыз,
Самға қыран — құстарым!
Десін,— ерлер жасаңыз!—
Кремльде штабың.
Майданға достар енген соқ,
Жеңіспен алға басармыз,
Жау жеңіп сендер келген соң,
Үлкен той жырдан жасармыз.
Қаламдас туған ақындар,
Майданға тартқан, жолдастар!
Фашисті құрта атыңдар,
Жолдарың болсын, жан достар!

16 июль, 1941 жыл

Тайыр Жароков майданға тартты жолдастар Тайыр Жароков өлеңдері

Пікірлер (0)

Пікір қалдырыңыз

Жиі қойылатын сұрақтар