Өлең, жыр, ақындар

Германия жұмыскерлеріне

  • 05.08.2022
  • 0
  • 0
  • 835
Европада талай жыл
«Болмаймын деп байға құл»
Күрескен баймен ерлерді
Бұл күнде байлар жеңіп тұр.
Азаматтар күрескен,
Талай жыл баймен тірескен,
Езді ғой байлар кеудесін,
Қайраты қайтып көніп тұр.
Құтырған байлар мас болып,
Пуанкаре бас болып,
Именбей басты кеудеңді.
Барлық әлем — өрмекші,
Арам тамақ өрмекші
Қанды сора бермекші.
Именбей басты үстіңді
Күшіне жауыз сеніп тұр.
Түнеріп көктен салбырап,
Қап-қара шашы жалбырап,
Қара пәле Қарынбай
Үстіңе келіп төніп тұр.
Қара пәле, албасты —
Жиналып бәрі жалғасты.
Қарусыз сорлы жұмыскер,
Қойныңа қолын сұғып тұр.
Кебеже қарын жуандар,
Сатылған байға суандар,
Қосылып өңкей қу залым
Ынсаптан, ардан шығып тұр.
Шанышқылап сені соймаққа,
Улы, суық қанжарын
Жеңіне ұстап тығып тұр.
Семіз шошқа күркілдек,
Арам қарын іркілдек
Іркілдек майлы аяқпен
Аш кеудеңді басып тұр.
Бауырлар-ау, тұрсайшы!
Пәлені бетке ұрсайшы!
Ақырып қайрат қылсайшы!
Жігерің не ғып жасып тұр?
Ақырын, әлсіз қымсынып,
Қойғаның ба ұмсынып?
Балтаңды қолға ал сайты!
Үрейің нағып қашып тұр?
Алыста сенен көз алмай,
Бұл жақта бауырың телміріп,
Жүрегі қайнап ашып тұр.

1923жыл, 8-ақпан



Пікірлер (0)

Пікір қалдырыңыз

Пролетариат

  • 0
  • 0

Билеген шаттық өмірді,
Күн де бүгін көңілді,
Толқындап жел келеді,
Әлдекімнің өлгенін,

Толық

Аспанға ұш

  • 0
  • 0

Мініп ап ұш аспанға аэроплан,
Тау басынан қызықсын ұшқан қыран.
Таба алмасын жауларың, жерде қалсын
Жорғалаған сені аңдып қу-сұм жылан.

Толық

От арба терезесінен

  • 0
  • 0

Шайқайды ырғап сүйреп алға,
Жүйрік поезд арбасы.
Жұрт далаға қарасады,
Терезеден жармасып.

Толық

Қарап көріңіз