Жеткіншегім, тартынба!

Жүдеген інім — жеткіншек,
Тән мен жаны шөлдеген.
Қаладағы көп інішек,
Қалың саяқ елдегі!
Надандық меңіреу тұманның,
Ауыры қалды артында.
Ентелей бас ілгері,
Жеткіншегім, тартынба!
Жас пен қанға боялған
Қиырсыз алыс артың бар.
Оны саған баяндар
Шежіре-тарих қартың бар.
Туысқандық, бостандық—
Міне, енді жаңа салтың бар.
Жолың түзу нұсқалды,
Күшті түзу тартыңдар!
Зор майданда бәйге алмақ—
Сендерге тиген сыбаға.
Арттағыны салмақтап,
Оларға беру сын-баға.
Майданы кең белгілі,
Бәйгең — бақыт алдың бар,
Қарақшың алда әйгілі,
Бақытты жеңіп алыңдар!
Бар әлемге бірдей қып,
Бақытты тұрмыс жаратпақ.
Табиғатты пілдей қып,
Білімге жегіп қаратпақ.
Талай зеңгір артында
Асуы қиын тау қалды.
Талай ғасыр алысқан,
Жеңіліп талай жау қалды.
Талай қиын артыңда
Дүлей, меңіреу жол қалды.
Талай, сусыз, қиырсыз,
Тікенді, тасты шөл қалды.
Талай елдің сол жолда
Табанынан қан аққан.
Талай жанның төгілген
Қанды жасы қабақтан.
Алдың енді айқын жол,
Енді берік табаның,
Сұм заман қалды артында,
Бақытты енді заманың.
Аспанға ұшар көк құрыш —
Аэроплан қанатың.
Автомобиль, машина —
Күшті көлік бар атың.
Бұрынғыдай бөгеттер,
Қиын емес жолында.
Аспан да, жер де сенікі,
Бар дүние қолыңда.
Надандық меңіреу тұманның
Аулы қалды артында.
Ентелей бас ілгері,
Жеткіншегім, тартынба!

1923 жыл, тамыз, Орынбор

---