Өлең, жыр, ақындар

Желтоқсаным!..

  • 06.01.2023
  • 0
  • 0
  • 655
Желтоқсаным!
Алынбаған қамалым,
Ашылмаған аралым,
Асқардағы Дарабоз,
Аспандаған Дарағым.
Желтоқсаным!
Жүрек әлі мұз бен қар,
Жібімеген ызғар бар,
Күншуағың – алданыш,
Көңілдегі сызды аңғар.
Желтоқсаным!
Алдаспаны рухымның,
Алға асқаны жұртымның.
Аңсарыңнан адасып,
Алжасқаны-ай шіркіннің!
Желтоқсаным!
Қара суық соғып тұр,
Қара жаңбыр жауып тұр.
Қарындастың көзінен
Қанды жасы тамып тұр.
Желтоқсаным!
Әзірейіл келіп тұр,
Темір тажал төніп тұр.
Қарындасты қорғамай,
Қалың жігіт неғып тұр?!
Желтоқсаным!
Қажытады қаяу-мұң,
Әлі ұйқылы-ояумын.
Өшірдім-ау отыңды,
Өл де маған, аяулым!
Желтоқсаным!
Желкілдеген арманым,
Жарты лашық, жардамын.
Жығылудан жалтақтап,
Жер бауырлап қалғаным.
Желтоқсаным!
Темірқазық Жұлдызым,
Томсарады нұр жүзің.
Жылтыраған сәулеңе
Жылына ма ұл-қызым?
Желтоқсаным!
Ділгір едің діліме.
Бақ тіледің тіліме.
Туған жердің тәу еттің
Үлбіреген гүліне.
Желтоқсаным!
Қайда казір сол мұрат?
Қаталады гүл жылап.
Арпалысқан рухыма
Асықпайды балбұлақ.
Желтоқсаным!
Бостандықта – боданмын,
Азаттықта – алаңмын!
Бордай үгіп намысты
Құмға сіңіп жоғалдым.
Желтоқсаным!
Сарық басып еңсені,
Саттым ба екен мен сені?
Ақиреттен тосатын
Ар-намыстың өлшемі!
Желтоқсаным!
Жорықтасың, жолдасың,
Алда – майдан, алда – сын.
Алаш рухын өшірмей,
Аллам өзі қолдасын.



Пікірлер (0)

Пікір қалдырыңыз

Артығали

  • 0
  • 0

Ақтық әлди, ақтық әлди...
Артығали, Артығали...
Қаршыға жыр қанатында
Кештің талай шалқыма күй.

Толық

Рас

  • 0
  • 0

Бір әмірдің, бір тәңірдің бары рас,
Сол Тәңірі жазғанынан жаңылмас.
Содан басқа,
Пайғамбар да, пенде де –

Толық

Талғар

  • 0
  • 0

Алатауда асқақтаған Талғар шың,
Талғар шыңда қыран қанат қомдансын.
Абыз жүрек аңыз жайлы толғансын,
Көне тарих келешекке жалғансын.

Толық

Қарап көріңіз

Басқа да жазбалар