Жақсылықты аңсау

Жақсы адамдар көп әлі сырласпаған,
Кезекті күн есігін бірге ашпаған.
Бір ғажабы, кездескен жақсы ағалар
Туыс маған, дос маған, құрдас маған.
Құрдас олар сәбиге, үлкенге де,
Қырламайды беделін бір көрмеге.
Айқарылған алмауыт кеуделерін –
«Адалдық» деп аталған жыр кернеген.
Тымырсық ой тәлкегін кім көрмеген?
Оның ойы бұлтпенен бүркелмеген.
Дала болып көсілген ақ көңілін –
«Дарқандық» деп аталған жыр кернеген.
Ұсақ тірлік маңында күн көрмеген,
Жақсы жандар шоқ жұлдыз – Үркер деген.
Шынайылық көксеген жүрегін де –
«Шыншылдық» деп аталған жыр кернеген.
Сырлассам деп жанмен сол сырласпаған,
Шығам үйден күн сайын жырлап санам.
Шығам үйден күн сайын оймен ізгі –
Кездессе деп тағы да бір жақсы адам.

---