Қызғыш құсым – шер құсым – Қорғанбек Аманжолов

(Махамбетше)

Махамбет шерлі қызғыш құс
Айналып ұшқан дүние
Астан да кестен болғанда –
Дүниеге мына кім ие?
Қызғыш құсы бабамның –
Болғандай-ақ бұл күнде
Қызғыш құсы адамның.
Қызғыш құсы даламның –
Болғандай-ақ бұл күнде
Қызғыш құсы ғаламның.
Қызғыш құсым шырлаған,
Бұлқан-талқан бұл ғалам.
Жеті басты аждаһа
Жындарын тажал қаптатып,
Өрмекші өлім торымен
Жаһанды жалпақ шырмаған.
Шығанағы Парсының,
Шырағындай Арсының,
Бағдаттайын шәһарды
Бомбалауға қарсымын.
Ғаделетті қорыған,
Ғадауатты торыған
Қызғыш құстай заршымын.
Һарон Рашид жайлаған
«Мың бір түннің» мекені,
Әл-Фараби ойлаған,
Мәлім еді ежелден
Ізгі қала екені.
Жайдың оғын заулатып,
Тозақ отын лаулатып,
Томырық күш төпеді.
Қызғыш құсы ғаламның,
Қызғыш құсы адамның
Жасын төкті-ау, қарашы!
Аждаһаның торынан
Айыруға нәһақты
Жетпей қалды-ау шамасы.
Сәбилердің көз жасы,
Көп халықтың қазасы,
Нәһақ жұрттың назасы –
Жаратқаннан болар-ды
Жалмауыздың жазасы...
Махамбет шерлі қызғыш құс
Шырлап ұшып көгімде,
Шырқырайды бүгін де,
Шырылдайды көлінде.
Қызғыш құсым – шер құсым,
Ереуіл салған ер құсым
Тау-шыңдарды басады,
Мұхиттардан асады.
Ғаделетті қориды,
Ғадауатты ториды,
Жалпақ жаһан төрінде!..