Маған берген сертіңді бұза тұрып

Маған берген сертіңді бұза тұрып,
Мына мені кеттің сен ыза қылып.
Азат болып мен қалдым жалғыз ғана,
Ақжүніс боп,сен кеттің ұзатылып…

Ар алдында жүрегім ақ қой менің,
Келін болу әр қызға бақ қой керім.
Жаным саған не дейін?
Бақытты бол!
Ақ орамал құт болсын, ақ көйлегің.

Шалқасынан ай жатқан төсін кере,
Жылу берді күздің сол кешінде не?
Айбергенов көшесі… Әрмен қарай,
Не болғаны қалқам-ау есіңдеме..?

Болмаса да икемім биге менің,
Сол бір кеште қоймадың, сүйреледің.
Иығымда қолдарың тербетіліп,
От сезімге күйгенмін, күйген едің.

құштарлықтың ағытып түймелерін,
Содан бері ешкіммен билемедім.
Қызыл раушан, гүлдеген ерініңді,
Күйеуіңнен бірінші сүйген едім…
Қош бол...

---