Өмір күрес,Өлең Ем – Назарбек Төлеген

Өлеңмен өмір сырын тербеледім,
Өлеңді жанға берер ем дер едім.
Кезгенде тіршіліктің мың белесін,
Жырыменен өз-өзіме дем беремін.

Жақсыдан мына жалған тұрмайды екен
Жамандық жақсы күнді ұрлайды екен
Ақ пенен қара жолақ кездесіп
Қуаныш мәңгі бола бермейді екен.
Жалғанның ащы тұсы ұқсас Құртқа,
Тұздары артық болса шыққан сыртқа.
Қатты да, әрі ащы болғанымен,
Сүйсініп оқта-текте салдық ұртқа.

Күн сайын жей алмаспыз құрт пен майды,
Тұздармен өмір алға жылжымайды.
Ара-кідік бал татып, шекер қосып,
Шәй ішпесек шекеміз де шылқымайды.

Бұл өмір күрес екен жанталасқан,
Қайғы мен қуанышын қатар тосқан.
Күн мен Түн кезектесіп келіп тұрар,
Бірде Күн, бірде Жерге Ай таласқан.