Қолтаңба

Аман жүр, айналайын, Адай інім,
Жақсының жанына ерген талайының.
Асылдың өзің де бір сынығысың,
Емессің жұқанасы қалайының.
Жігіттің не мықтысын мен де көрдім,
Атының қатты тартқан шап айылын.
Бар болсаң барлығыңды көре алмайды,
Жоқ болсаң бере алмайды ағайының.
Төбеңе әңгіртаяқ ойнатады,
Байқаусыз бола қалса сәл айыбың.
Өнерді кие тұтқан құр қалмайды,
Есігін ашып көңіл сарайының.
Жүргендей сезінесің кейде өзіңді
Ішінде жыртқыш пенен жабайының.
Кісіден құны қымбат осы күні
Шошқаның қорсылдаған торайының.
Қазаққа дауа бар ма жете алмаған,
Біз түгіл, қадіріне Абайының?!
Бағзыдан келе жатқан басын бұрмай,
Бұл өмір солай, інім, солай інім!