Қазақтық Қаныш-аға жер иесі – Кәкімбек Салықов

Данаға асыл теңеу келер бейім,
Шындық сол шырай бұзбай сенер зейін.
Қазақтық Қаныш-аға жер иесі,
«Сүлеймен – су иесі» – дегендейін.

Қайырмасы:
Бар қазақтың ұланы,
Баянауыл қыраны.
Түн жұлдызын ашқанда,
Жүзі жайнар аспанда,
Ардақтаймыз арысты
Жер иесі Қанышты.

Көз салсақ теңіз-дала бел, белеске,
Бәрі де ата-баба жері емес пе?!
Солардың арасынан жез-кемедей,
Жезқазған Қанышты айтсаң келеді еске.

Қайырмасы

Таңданса беу, қазағым, ғасыр саған,
Кен қайда, кең даламда ашылмаған?!
Кестелеп ен байлықты дестелеген,
Қаныштай әлемге әйгі асыл данаң.

Қайырмасы