Алыстағы ағайын

Ағайын, алыс жүрген аңсап елін,
Сағынған жетер ме екен жан сәлемім?
Жел қуған қаңбақтайын тағдырларың,
Сыздатты жүрегімді қанша менің!

Қайырмасы:
Құшағымды ашып,
Кеудеме басып,
Шаттана тасып,
Қарсы алайын!
Арнаңнан асып,
Күлкіңді шашып,
Асыға басып,
Келші ағайын!

Іздемей жата алам ба сыңарымды,
Сыңарсыз айта алам ба жыр-әнімді?!
Қиырға кеткен тарап қимастарым,
Шулаттың кеудемдегі ұларымды.

Қайырмасы

Басайын асқындырмай күйігімді,
Сағыныш бұлты талай үйірілді.
Ықтырған ызғар жылдар қандастарым,
Табатын күн болар ма үйіріңді.

Қайырмасы

---