Орман

Орман – қырдың, ойдың да
Әсем бағы, Жер көркі.
Жыл он екі ай бойында
Жайнап тұрар біркелкі.

Қыста да әсем орманда –
Соғар боран, бұрқасын
Ақ мамыққа орарда
Әрбір бұтақ, бұтасын.

Орман әсем көктемде –
Жайнап жасыл желектер,
Гүлдер шағы жеткенде
Ұшқат, мойыл, жидектер.

Орман әсем жазда да –
Маужырап бір балқиды,
Ауада ыстық, таза да
Шайыр иісі аңқиды.

Орман әсем күзде ерек –
Жерге алтындай жарқырап,
Бұтағынан көк терек
Төгіледі жапырақ.

Қып-қызыл боп бүргеннің
Жемісі әбден піседі,
Күзгі орманда жүргеннің
Ынтығы арта түседі.

Орман – қырдың, ойдың да
Әсем бағы, Жер көркі.
Жыл он екі ай бойында
Жайнап тұрар біркелкі.

---