Анаға алғыс

Ризамын сізге жан ана,
Тастамай бізді далаға.
Қиналсаң-дағы жүгіріп,
Өсірдің бізді қалада.

Қырқымнан шықпай жатып-ақ,
Алып шықтыңыз жұмысқа.
Жасанды сүтті ішкізбей,
Тойдырдың нәрлі уызға.

Қалаған затты әперіп,
Қайда барсаң да көтеріп.
Жәутеңдетпедің жат қолда,
Ойыншықты үйіп әкеліп.

Тілімді жастай дамыттың,
Әріпті өзің таныттың.
Оқуда озат болуға,
Бар жігеріңді салыпсың.

Сіз жазып берген тақпақтар,
Әкелді орын, мадақтар!
Талдау жасауды үйреттің,
Пайда алып терең сабақтан.

Қазақ пен орыс, ағылшын,
Тілінде сөйлеп көрсеттің.
Сөйлемді дұрыс құрауға,
Білемін, қанша тер төктің.

Еш кетпей бүгін еңбегің,
Ұл-қызың сыйлы мектепте.
Анашым  - жарық жұлдызым,
Жана беріңіз биікте!

Мен сізден алып зор тәлім,
Үлгілі адам боламын.
Ұстаздық жолын жалғаймын,
Түзетер қазақ қоғамын!

Жасай бер, жайнап анашым,
Әр күнің болсын мереке!
Сіз барда біздер бақытты,
Айнала толы береке!

Гүлмекен Қасенбай
01.03.2025