Дұғамдасың

Бұйырмаса қайтесің бағыңа адам?!.
Бір пендедей мына мен де сағына алам.
Мені ойла деп жарығым ренжи көрме,
Сені ойламаған күнімнің бәрі қараң.

Жүрек соғып тұрғанда ұдайы шын,
Қызғанамын, ашиды удай ішім.
Сен маған қызғанбашы дей бер,
Бірақ,
Қызғанбаған сәтімде құдай ұрсын.

Есіме алам өзіңді кеш, күнімен.
Түске ауып келесің сен түнімен,
Көрер бейнем ұнамды, жақсы кілең.
Естен шықсаң есімді ұмытуға,
Ант етемін анамның ақ сүтімен.

Сырттай сүйер, өзгеге ұнар басың,
Гүлін берер, е мейлі жыр арнасын.
Бірақ, еркем, сен менің сұрап жүрген,
"Тек мендік болсын" деген дұғамдасың.