Қызыма өсиет – Гүлмекен Қасенбай

Қызым сенің аппақ жүзің,
Айдан сұлу әдемі.
Сол жүзіңе суық көздер,
Қадалмасын дәмелі.

Нәзік қолың үлбіреген,
Жұмсақ,  нәзік салалы.
Сол салалы саусағыңа,
Қол тимесін арамы.

Ал шаштарың қара мақпал,
Толқындана төгілген.
Орамалға жасырынсын,
Жат көздерге көрінбей.

Күлімдеген қара көзді,
Кірпіктерің қоршаған.
Төмен қарай жауып жүрсін,
Кездескенде ер адам.

Иман,  иба,  әдеп,  ахлақ,
Әр сөзіңнен білінсін.
Дұшпаның да мін таба алмай,
Өз жанынан түңілсін.

Ал жүрегің жұмсақ,  нұрлы
Мейірім толған тап-таза.
Шуақ шашқан кірсіз болсын,
Жылу табар басқалар.

Сол жүрегің ғашық болсын,
Жаратушы Иеңе.
Одан артық сені сүйер,
Біреу бар деп, еш сенбе!

Пайғамбарға сәлем жолдап,
Салауат айт күні-түн.
Үмметіміз Мұхаммедтің,
Шүкірлік қыл сол үшін!

Ата-анаңа алғысыңды айт,
Өмірі өткен сендер деп.
Олар үшін дұға жаса,
Сауап жібер жиі көп.

Құран, хадис күнде оқы,
Мықты болсын иманың.
Иманы жоқ адам болсаң,
Өзіңді отқа қиғаның!

Мына өмір қас қағым сәт,
Кеңге салма арқаны..
Қияметте аман болғын,
Сол менің бар арманым!

28.06.2023