Ленин таулары

Москвада, Октябрьдің таңында,
Тұрмын толқып Лениннің тауында.
Биіктіктің символы ол, теңесер
Оған тау жоқ бүкіл жердің шарында.
Таулар жатыр омырауын таңға ашқан,
Баулар жатыр тау жалына жармасқан.
Бюстерден қарайды ұлы ғалымдар
Ғасырлардай бір-біріне жалғасқан.
Тағдырменен жекпе-жек кеп беттесіп,
Қара түнде қайғы деген өрт кешіп,
Тұрған мұнда Герцен менен Огарев
Қол алысып, болашаққа серттесіп.
Талай қоңырау соға түсіп басылды,
Талай дауыл борай түсіп ашылды.
Ленинді күтті асыға ғасырлар,
Ал Ленин жасап жатты ғасырды.
Жарқ етті нұр, қақты кенет көк дабыл,
Жер қоқысын кетті үйіріп от дауыл.
Огарев пен Герцен күткен бір кезгі
Ленин боп келіп жетті Октябрь.
Жалау етіп таңның қызыл арайын.
Ол орнатты мәңгі жазды — май айын.
Гранитті Ломоносов тұр енді
Жұлдыздармен көтеріп өз сарайын,
Бұрынғы ескі Воробьев тауы бұл,
Жанбай оның келе жатты бағы бір,
Оны Ленин атыменен атады,
Жаңа дүние жасады да шабуыл.
Алады тау көз жанарын үйіріп,
Кете алмайды көркіне жан сүйініп.
Барлық сапар басталады бұл таудан,
Барлық жолдар осы тауға құйылып.