Дала қыраны

Сәлем бердім асығып,
Армысың жонды Жоңғарым.
Биікте жатыр асылып,
Тарамдалған жолдарың.
Бала боп кеттім қасында,
Аспан мен шындар тілдескен.
Ыстық қой маған тасың да,
Жан-құрбыдай бірге өскен.
Әлде недей тіл қатты,
Тау іші бір сәт күңгірлеп.
Белесте оқшау тұрды атты,
Күй төкті маңай күмбірлеп.
Сол әнді бейне дала паң,
Тыңдайды ұзақ ұйып қап.
Қиядан ұшқан балапан,
Кеткендей болды ұйықтап.
Жанына жуық таядым,
Биікте жігіт тұр әне.
Сүйене түсіп таяғын,
Даланың қас қыраны!