Оян елім – Ақнұр Аншаева

Оян елім
оянатын кез келді,
Жалқау ойға арандатар төзбе енді.
Сен ұйқыда жатқан кезде самарқау,
Бүтін әлем бір-ақ сәтте өзгерді.

Оян жұртым
ұйықтап жатар кез емес,
Жақын досың,жанашырың көп емес.
Алға бассаң шыңға қарай самғатып,
Жолыңыздан ешкім сірә бөгемес.

Оян ұлтым
көтер басты берілме,
Бос нәрсеге еңсе түсіп егілме.
Әлем жұрты еңбек етсе күні-түн,
Қарап қалып қайран жұртым төгілме.

Оян қазақ
орда бұзар бұл шағың,
Ұлтың берген ұлағатты бар тағың.
Көкке самға құлаш ұрып аспанға,
Құлап жатсаң сынбасыншы тек сағың.

Әлем жұртын мойындатар кез келді,
Барша xалық тілеулесіп дем берді.
Ұрпағы үшін ұран еткен мәңгілік,
Демеп өтер бауырларды көз көрді.

Берілмеңдер биіктейтін кездерің,
Ұран етіп ұлықтаушы сөздерін.
Келер ұрпақ аңыз ету үшін де,
Үлгі болар аға буын өздерің.

Аншаева Ақнұр