Алғаным төрт жүгері толық айып – Тұрмағамбет Ізтілеуұлы

Алғаным төрт жүгері толық айып,
Айыбымды өзім де айттым жұртқа жайып.
Тең көрмей төртеуін де айыптының,
Маржаның шұқырына қалдың тайып.
Көңілді күліп-ойнап көтермесек,
Не бітеді отырғанмен құр мұңайып?
Болғанмен жасың кіші, жұртты жөндеп,
Әкімге әділетті болдың найып.
Шамалы сол себептен сөз айттым, інім,
Қалсын деп тамашаға ел-жұрт байып.
Жақтырмай жазып жауап назымменен,
Тастадың жүрегімді жүдә шайып.
"Бай болады к...н қысқан" дегендей - ақ,
Сен жықтың осы ретте, мен болдым майып.
Келтірме кеуіліңе інім оны-мұны,
Көңіліңе: "Кеттің - ау, - деп, - адырайып!".
Аяғын осы араға тоғарайын,
Кейірсің, кетсе сөзім тағы ұзайып.