Бұзықтарға – Тұрмағамбет Ізтілеуұлы

Дәулетін Сталиннің шайқап, түзіп,
Жүргенмен жауыз ниет, өңшең бұзық.
Қиянат қыламын деп қолға түсіп,
Өртеніп, оттарына өлді - ау шыжып.
Қайткенмен көрінеді - ау көзіне иттің,
Боқтары бұғып жейтін майлы шұжық.
Жоқ қылған жүз мың рахмет сотқа ондай,
Ұясын жамандықтың жатқан быжып.
Татаулы ой тауып тағы бұзықтарды,
Болар еді боршаласа өте қызық.
Сондықтан: "Соңғыларға сөз болсын", - деп,
Газетке жабыла жұрт жатыр сызып.
Олардың осындайша оқтастарын,
Қолайлы іс қата қылмай қою тізіп.
Бар шығар байқағанға бірлі-жарым,
Арланып, арқалары жүрген қызып.
"Сақтықта қорлық болмайды" дегендей - ақ,
Әлі де аңлау артық сарқып, сүзіп.
Табылса тап осындай таптап, езіп,
Жоқ қылу жүдә жақсы мойнын үзіп.
Олардың ойлары ұрлау заңымызды,
Сияқты шұғылалы жауқар жүзік.