Қадыр Мырза Әли

Мен айтайын

Қазақша өлең мәтіні, өлең жолдары және толық нұсқасы.

29.04.2019
0
0
5308

Мен айтайын —
Сен де менен хал сұра —
Бұрынғыдай қызықтырмас бал сыра.
Асу асып,
Әжептәуір бел асып,
Аға болып қалсам керек мен, сірә.
Бір кездері жүруші едім ерігіп,
Бірде күнге,
Бірде түнге беріліп,
Енді мені қажытады қыдырыс.
Енді мені шаршатады серілік.
Мен бүгінде көне алмаймын тәлкекке,
Жайлап сөйле,
Кеудеңді ұрма,
Саңқ етпе!
Мені қазір қажытады жиын да,
Мені қазір шаршатады банкет те!
Кетіп бара жатыр менің күнде есем,
Тіршілікпен қысқа-қысқа тілдесем.
Мені қазір шаршатады мақтау да,
Оның өзін тауып айта білмесең.
Үлесіме —
Асу үшін биікті —
Ауырлық пен қиындықтар тиіпті.
Бірақ мені —
Істесем де күндіз-түн,
Шаршатпайды жұмыс қана сүйікті!

Қадыр Мырза Әли жұмыс мен айтайын Қадыр Мырза Әли өлеңдері

Пікірлер (0)

Пікір қалдырыңыз

Жиі қойылатын сұрақтар